Хроника · Утринско издание 22.11. · вест 27 од 31
Осум лица приведени за семејно насилство низ државата
Полицијата поднесе и две кривични пријави за загрозување на сигурноста и телесна повреда во Кочани и Делчевско.

Министерството за внатрешни работи информира дека осум лица се лишени од слобода вчера и рано утрово по пријави за физички напади, закани и непочитување судски мерки за заштита.
Во Кочани, полицијата го лишила од слобода К.А. (40), кој, според пријавата, во домот на роднини на сопругата физички ги нападнал своите малолетни деца и други членови на семејството.
Во Тетово, Ј.М. (49) од Балин Дол бил приведен по пријава од неговата 38-годишна сопруга дека ја следел и ѝ се заканувал дека ќе ѝ ги одземе двете малолетни деца.
Во Кичево, З.З. (56) бил приведен затоа што, според полицијата, не го почитувал судското решение со кое му биле изречени привремени мерки за заштита од семејно насилство кон неговата 49-годишна сопруга.
Во Македонска Каменица, Г.Г. (34) бил лишен од слобода по пријава дека ѝ се заканувал и физички ја нападнал својата 23-годишна сопруга.
Во Гостивар, М.Е. (32) бил приведен по пријава дека ѝ се заканувал по телефон на својата 28-годишна сопруга додека таа била со двете малолетни деца во Медицинскиот центар.
Во Куманово, во два одделни случаи, полицијата ги лишила од слобода М.М. (26), по пријава дека се однесувал агресивно кон својата мајка, и Б.С. (38), по пријава дека физички ја нападнал својата поранешна сопруга.
Во Струмица, Д.К. (36) бил лишен од слобода по пријава за агресивно однесување кон 52-годишна жена пред нејзиниот семеен дом, при што му биле измерени 2,58 промили алкохол.
Во Полициската станица Чаир бил извршен службен разговор со Е.Б. (44) од Скопје по пријава дека физички ја нападнал својата 39-годишна партнерка.
Одделението за внатрешни работи Кочани поднело кривична пријава против Ј.Д. (67) поради сомнение за загрозување на сигурноста, бидејќи, според полицијата, на 3 ноември се однесувал агресивно кон сопругата и ѝ се заканувал. Надворешната канцеларија за криминалистички работи Делчево поднела кривична пријава против А.Л. (45) поради сомнение за телесна повреда и загрозување на сигурноста, бидејќи, според полицијата, на 7 ноември го навредувал своето 13-годишно дете, а следниот ден се обидел да го нападне со стаклен предмет.